ცისკარზე – მოციქულისა იუდასი (I-ქართულიდან და რუსულიდან): ინ. XXI, 15-25. [დას. ჲზ(67)]. ჟამისწირვაზე – რიგისა: რომ. 105 დას. XI, 2-12.  მთ. 42 დას. XI, 20-26. მოციქულისა იუდასი: იუდ. I, 1-10. [დას. ოზ(77)]. ინ. XIV, 21-24. [დას. მჱ(48)-შუა].

რიგისა (ოთხშაბათისა): ჰრომაელთა მიმართ ეპისტოლე წმიდისა მოციქულისა პავლჱსი, XI, 2-12. [დას. რე(105)]:

რომ. XI: 2(ბ) † (ძმანო, †) არა უწყითა ელიაჲსი, რასა-იგი იტყჳს წიგნი? ვითარ-იგი შეემთხუევის ღმერთსა შესმენად ისრაჱლისა და იტყჳს: 3 „უფალო, წინაჲსწარმეტყუელნი შენნი მოსწყჳდნეს და საკურთხეველნი შენნი დაარღჳნეს; და მე დაშთომილ ვარ მარტოჲ, და ეძიებენ სულსაცა ჩემსა“. 4 არამედ რასა ეტყჳს მას ბრძანებაჲ იგი სიტყჳსაჲ მის? „დამიტევებიეს თავისა ჩემისა შჳდ ათასი მამაკაცი, რომელთა არა მოუდრეკიან მუჴლნი მათნი ბაალისა“. 5 ეგრეთცა უკუე და აწცა ჟამსა ამას ნეშტი რჩევით მადლითა მით იქმნა. 6 ხოლო უკუეთუ მადლით, არღარა საქმეთაგან; უკუეთუ არა, მადლი იგი არღარა შეირაცხების მადლად. უკუეთუ კულა საქმეთაგან, არღარა არს მადლი, ვინაჲთგან საქმე იგი არღარა არს საქმე. 7 აწ უკუე რაჲ? რომელსა ეძიებს ისრაჱლი, ამას ვერ მიემთხჳა, ხოლო რჩევითი იგი მიემთხჳა, და სხუანი იგი დაბრმეს, 8 ვითარცა წერილ არს: „მოსცა მათ ღმერთმან სული მწუხარებისაჲ, თუალნი, რაჲთა არა ხედვიდენ, და ყურნი, რაჲთა არა ესმოდის, ვიდრე დღენდელად დღედმდე“. 9 და დავით იტყჳს: „(ექმენინ)* [იქმენინ]** ტაბლაჲ მათი მათ წინაშე საბრჴე, და სანადირო და მისაგებელ და საცთურ მათდა. 10 დაუბნელდედ თუალნი მათნი, რაჲთა არა ხედვიდენ, და ზურგი მათი მარადის შედრიკე“. 11 ხოლო ვიტყჳ: ნუუკუე შეუბრკუმა, რაჲთა დაეცნენ? ნუ იყოფინ! არამედ მათითა მით შეცოდებითა ცხორებაჲ წარმართთაჲ იქმნა (საშურებელად)* [საშურვებელად]** მათდა. 12 ხოლო უკუეთუ შეცოდებაჲ იგი მათი – სიმდიდრე სოფლისა, და ძლეულებაჲ იგი მათი – სიმდიდრე წარმართთა, რაოდენ უფროჲს სავსებაჲ იგი მათი.

† † † † † † †

* სამოციქულოს ამჟამად არსებული რედაქციიდან [2010].

** სამოციქულოს ახალი (ედიშერ ჭელიძის) რედაქციიდან [2017].

† † † † † † †

რიგისა (ოთხშაბათისა): სახარებაჲ მათჱს თავისაჲ, XI, 20-26. [დას. მბ(42)]:

მთ. XI: 20(ბ) † (მას ჟამსა შინა †) იწყო იესუ ყუედრებად ქალაქებისა მის, სადა-იგი იქმნნეს უმრავლესნი ძალნი მისნი, რამეთუ არა შეინანეს: 21 „ვაჲ შენდა, ქორაზინ, და ვაჲ შენდა, ბეთსაიდა! რამეთუ ტჳროსს თუმცა და სიდონს იქმნნეს ძალნი, რომელნი იქმნნეს თქუენ შორის, მაშინვე სამემცა ძაძითა ნაცარსა ზედა მსხდომარეთა შეინანეს. 22 ხოლო გეტყჳ თქუენ, რამეთუ ტჳროსი და სიდონი უმოლხინეს იყოს დღესა მას საშჯელისასა, ვიდრე თქუენ. 23 ხოლო შენ, კაპერნაუმ, ნუ ცადმდე აჰმაღლდები, არამედ ჯოჯოხეთადმდე შთაჰჴდე, რამეთუ სოდომს თუმცა იქმნნეს ძალნი, რომელნი იქმნნეს შენ შორის, ჰგიანმცა დღენდელად დღედმდე. 24 ხოლო გეტყჳ თქუენ, რამეთუ ქუეყანაჲ იგი სოდომისაჲ უმოლხინეს იყოს დღესა მას საშჯელისასა, ვიდრე შენ“. 25 მას ჟამსა შინა იტყოდა იესუ და თქუა: „აღგიარებ შენ, მამაო, უფალო ცისა და ქუეყანისაო, რამეთუ დაჰფარე ესე ბრძენთაგან და მეცნიერთა და გამოუცხადე ესე ჩჩჳლთა. 26 ჰე, მამაო, რამეთუ ესრეთ სათნო იყო შენ წინაშე“.

† † † † † † †